I Solund har havet alltid vore viktig. Transportårane gjekk på havet, middagen kom frå havet og inntekta kom frå havet. I generasjonar har familiar lagt ut på havet for å hauste av rikdommane det gjev. Med bakgrunn i denne arven kjøpte brørne Magnar og Øyvind, saman med far deira Arne, sjarken Øyasund i 1991. Brørne var då 18 og 20 år gamle og var klare for hardt arbeid, vinterstormar og månadar vekke i slengen. Skreifiske i Lofoten var hovudfiskeriet, og Øyasund vart bytta ut med Vasstind etter eit år, då behovet for ein torskekvote meldte seg. Det var kalde lugarar og berre kaldt vatn om bord på både Øyasund og Vasstind.

​

Det var samstundes ikkje berre mennene i familien som bidrog. Etter 12 veker på lofotfiske med Vasstind ryktast det at haugen med skittentøy som vart levert i Ytrøy nådde opp til taket på vaskerommet. Linne Lending tok også ansvar for å halde orden på økonomien i firmaet, og er i dag dagleg leiar. Med hardt arbeid til sjøs og støttande familie og partnarar gjekk fiskeriet godt, og i 1995 vart skøyta Mogutt på 70 fot kjøpt for å kunne satse på fiske med not. Bjarte Lending, bror til Øyvind og Magnar vart då også med på laget, og dei skipa då også Lending Rederi saman med faren Arne Lending.